«BASECHEM» ЖШС — «Ақтау теңіз порты» арнайы экономикалық аймағында орналасқан заманауи отандық химия өнеркәсібі кәсіпорны. Компания 2016 жылы құрылған және бүгінде Маңғыстау облысындағы перспективалы өндірістік жобалардың бірі болып табылады. 2017 жылы компанияға химиялық заттар өндіретін зауыт салу үшін 4 гектар жер телімі бөлінді. Өндірістік кешеннің құрылысы 2023 жылы толық аяқталды. Қазіргі таңда кәсіпорын сынамалық өнім шығарумен айналысуда. Өнімдер отандық және шетелдік әлеуетті серіктестерге жіберіліп, СТ-KZ сертификаттарын қоса алғанда қажетті сертификаттар мен рұқсат құжаттарын рәсімдеу жұмыстары жүргізілуде. Компания өнімі ішкі нарыққа да, экспортқа да бағытталған. Зауыттың өндірістік қуаты жылына 20 000 тоннаға дейін дайын өнім шығаруға мүмкіндік береді. Компания фосфорорганикалық қышқылдар мен тұздар, деэмульгаторлар, коррозия ингибиторлары, металдарды алдын ала өңдеуге арналған өнімдер, биоцидтер мен альгицидтер, H2S және меркаптандарды залалсыздандырғыштар, су тазартуға арналған өнімдер, поликарбон қышқылдары мен тұздары, аминдер, амидтер, имидазолиндер және төрттік қосылыстар негізіндегі өнімдер, шаң басуға арналған химикаттар және полиалюминий хлориді сияқты химиялық өнімдердің кең ассортиментін шығарады. «BASECHEM» ЖШС заманауи технологияларды белсенді түрде енгізіп, отандық химия өндірісін дамытуға және Қазақстанның экспорттық әлеуетін арттыруға бағытталған. 2026 жылы компания Астана қаласында өткен «Ұлттық өнім» отандық өндірушілер көрмесіне қатысып, өз өнімдері мен өндірістік мүмкіндіктерін таныстырды. Осы арқылы компания Маңғыстау облысының өнеркәсіптік әлеуетін жоғары деңгейде көрсетті.

Жобаны жүзеге асыру «Қазақстан Халық Банкі» АҚ-ның қаржылық қолдауы және «Даму» қоры тарапынан пайыздық мөлшерлемені субсидиялау арқасында мүмкін болды. Жеңілдетілген қаржыландыру компанияға Ақтау қаласында заманауи өндірістік және қойма базасын салуға, сондай-ақ қажетті технологиялық жабдықтарды сатып алуға мүмкіндік берді.

Мекенжайы: Маңғыстау облысы, Ақтау қаласы, өндірістік база №5, №38/1 учаске.

Телефон: +7 701 915 11 33