Ұлттық мәдениетке деген сүйіспеншілік, қайталанбас бұйымдар жасауға деген ұмтылыс және дәстүрді сақтауға деген ниет кәсіпкер Қамысбаева Гүлбану Төлегенқызының табысты бизнесінің негізіне айналды. Бүгінде Banu Tulegen бренді авторлық ұлттық киім топтамаларының арқасында Маңғыстау облысынан тыс жерлерде де кеңінен танымал.

2017 жылы Гүлбану Қамысбаева тігін ісі бойынша кәсіби білім алып, ательеде еңбек жолын бастады. Жинақтаған тәжірибесі мен өз күшіне деген сенімі бірнеше айдан кейін жеке ательесін ашуына жол ашты. Кейін сапалы маталар іздеп Дубайға, ал заманауи жабдықтар сатып алу үшін Қытайға барды. Компания өз қызметін 2019 жылы ресми түрде бастады. Жобаның бастапқы инвестициясы шамамен 3 миллион теңгені құрады, ал алғашқы қадамдарын серіктесімен бірге жасады. Banu Tulegen бренді алғашқы күннен бастап ұлттық нақыш пен заманауи сән үрдістерін үйлестірген киімдер тігеді. Брендтің ерекшелігі – мәдени мұрадан шабыт алған 3D-өрнектер қолданылған авторлық топтамалар. Бірнеше жылдың ішінде шағын ателье тұрақты дамып, қызметкерлер саны 3-тен 6 адамға дейін өсті. Әлеуметтік желілердегі белсенді жұмыстың нәтижесінде брендтің өнімдері Қазақстанның түкпір-түкпіріне жеткізіліп, компания ірі көрмелер мен сән көрсетілімдеріне тұрақты қатысып келеді.

           Бизнестің дамуына «Даму» қорының қолдауы зор серпін берді. Кәсіпкер «2021–2025 жылдарға арналған кәсіпкерлікті дамыту жөніндегі ұлттық жоба» аясында «Банк ЦентрКредит» АҚ арқылы несие мөлшерлемесін субсидиялау қолдауын алды. Соның арқасында кәсіпкер үшін сыйақы мөлшерлемесі 8%-ды құрап, жеке ғимарат сатып алып, оны жөндеуге мүмкіндік туды. Нәтижесінде өндіріс көлемі ұлғайып, клиенттер саны артты, ал тапсырыстар Қазақстанның барлық өңірінен түсе бастады. Гүлбану Қамысбаеваның маңызды жетістіктерінің бірі – Ташкент қаласында өткен халықаралық сән көрсетіліміне қатысуы және Әлемдік дизайнерлер қауымдастығының мүшесі атануы.

Алдағы уақытта кәсіпкер брендтің даму аясын кеңейтіп, қазақстандық ұлттық сәнді халықаралық деңгейде танытуды жоспарлап отыр. Гүлбану Қамысбаеваның айтуынша, жетістікке жетудің басты шарты – қиындықтардан қорықпай, алға ұмтылу.

           «Егер өз ісіңізді бастаған болсаңыз, ешқашан қиындықтың алдында тоқтамаңыз. Алға батыл қадам жасаңыз, өйткені табысқа жетелейтін басты қасиет – табандылық».

Мекенжайы: Маңғыстау облысы, Ақтау қаласы, 34-шағынаудан, 4-үй.
Телефон: +7 778 509 30 85
Instagram: @banu_tulegen_