«Строительный двор» дүкендер желісінің бас директоры әрі негізін қалаушы Шостак Павел Сергеевич өз кәсібін 2010 жылы бастады.

Кәсіптің алғашқы кезеңінде оның қолында тек идея, аз мөлшердегі жеке қаражат және нәтижеге қол жеткізуге деген зор ынта болды. Құрылыс материалдарын сататын алғашқы дүкен Щучинск қаласында ашылып, команда небәрі екі адамнан тұрды.

Алғашқы сатып алушылар туған қаласының тұрғындары болды. Дәл солардың сенімі таңдалған бағыттың дұрыс екенін көрсетіп, бизнесті әрі қарай дамытуға сенім берді.

Алғашқы жылдар оңай болған жоқ. Бір уақытта клиенттерді іздеуге, дүкен жұмысын жолға қоюға, ассортимент қалыптастыруға, жарнаманы іске қосуға және команда жинауға тура келді. Сатылым көлемі біртіндеп өсті, алайда әрбір қателік құнды тәжірибеге айналып, неғұрлым салмақты әрі дұрыс шешімдер қабылдауға көмектесті.

«Мен әрдайым қиындықтарды осы жолдың бір бөлігі деп санадым. Егер тоқтамасаң, олар сені шыңдап, дұрыс шешімдер қабылдауға көмектеседі», — дейді Павел Шостак.

Жылдар бойы ол күнделікті операциялық міндеттерді орындаудан компания басшылығына дейінгі жолдан өтті. Сондықтан ол бизнесті тек есептер арқылы емес, қоймалардағы, дүкендердегі және қызметкерлердің күнделікті жұмысындағы нақты үдерістер арқылы да жақсы біледі. Бүгінде компания жұмысында қолданылатын көптеген қағидат дайын шешімдерге емес, оның жеке практикалық тәжірибесіне сүйене отырып қалыптасты.

Павел Шостак үшін негізгі қағидаттардың бірі — адамдарға деген көзқарас. Ол: «Басшы бұйрық бермеуі керек, керісінше команда ең жоғары нәтижеге қол жеткізе алатын жағдай жасауы тиіс», — деп есептейді. Сондықтан компанияда әрбір қызметкердің ортақ нәтижеге деген жауапкершілігіне үлкен мән беріледі.

2020 жылы компания «Даму» қорының субсидиялау түріндегі қаржылық қолдауына ие болды. Қаражат құрылыс жұмыстарына және айналым қаражатын толықтыруға бағытталды. Бұл бизнестің дамуын едәуір жеделдетуге мүмкіндік берді.Мемлекеттік қолдау алғаннан кейін компания түсім көлемін арттырып, жаңа филиалдар ашып, 30-дан астам жаңа жұмыс орнын құрды. Бүгінде «Строительный двор» дүкендер желісі Ақмола облысының үш қаласында — Щучинск, Көкшетау және Макинск қалаларында жұмыс істейді.Қазіргі таңда компания бес филиалды біріктіреді, 150 қызметкерден тұратын командасы бар және жыл сайын 100 мыңнан астам клиентке қызмет көрсетеді. Алайда Павел Шостак үшін басты жетістік — сандық көрсеткіштер емес.

Жылдар бойы компанияға мықты команда қалыптастырып, тұрақты клиенттердің сенімін сақтап, жеткізушілермен берік әрі сенімді серіктестік қарым-қатынас орнату мүмкін болды. Компанияда кадрлардың ауысуы іс жүзінде жоқ, ал көптеген қызметкерлер мұнда бірнеше жылдан бері еңбек етіп келеді.

Дамудың тағы бір маңызды қағидаты — бизнесті кеңейтуге асықпау. Әрбір жаңа филиал компания жұмыс істеп тұрған дүкендердегідей жоғары деңгейдегі қызмет көрсету сапасын қамтамасыз ете алатынына толық көз жеткізген кезде ғана ашылады.

Алдағы жылдары «Строительный двор» тағы бір филиал ашып, құрылыс материалдарының ассортиментін кеңейтуді жоспарлап отыр. Компанияның басты мақсаты — бизнестің ауқымын жай ғана ұлғайту емес, сатып алушылар үшін одан әрі ыңғайлы әрі пайдалы болу.

Павел Шостак бастаушы кәсіпкерлерге үнемі білім алып, дамып отыруға кеңес береді: «Әрқашан және барлық жерде үйреніңіздер. Жаңа білім — бизнесті дамытуға салынатын ең үздік инвестиция».

Ол көптеген жылдар бойы ұстанып келе жатқан тағы бір қағида бар:

«Өлтірмеген нәрсе — күшейтеді».

Ақмола облысы, Щучинск қаласы, Сарыарқа көшесі, 19А
Тел.: +7 776 734 53 33
Instagram: @stroydvor_schuchinsk, @stroydvor_makinsk, @stroydvor_kokshetay