Жабу
Кеңес ал!
Бүгінде Зура Ашурматқызы Қонурбаева басқаратын жылыжай шаруашылығы 15 жылдан астам уақыттан бері жұмыс істеп келеді. Төрт жыл бойы Зура жұбайымен бірге жылыжайды жалға алып, тәжірибе мен білім жинады, ал 2024 жылғы 19 маусымда олар маңызды қадам жасап – өз кәсібің сатып алды. Бастауға негізгі себепкер Зуранің жұбайы – кәсіби агроном болды. Оның ауыл шаруашылығындағы білімі мен тәжірибесі ортақ іске сенімді қадам жасауға мүмкіндік берді.
Қазіргі таңда кәсіпорын қияр өсіреді, ал қыс мезгілінде қызанақ пен қиярды жыл бойы өсіру үшін 200-ден астам шам сатып алуды жоспарлап отыр. Компания жыл сайын болгар бұрышының, баклажан мен қызанақтың көшетін дайындайды, сондай-ақ Қарағанды қаласына жеткізілетін шамамен 50 тонна жасыл пияз өсіреді. Өнімдер «Самади» және «Юникс» секілді ірі сауда желілерінде де ұсынылған.
Жеке бір бағыт – сәндік өсімдік шаруашылығы. Жылыжай бақша және балкон гүлдерінің бай ассортиментімен танымал: газания, георгин, левкой, петунья, центравия, қалампыр, барқытгүлдер және басқа да көптеген гүлдер. Бұл өсімдіктер сатып алушылар арасында сұранысқа ие және үйлерді, аулаларды, қоғамдық кеңістіктерді әсемдеуге көмектеседі. Кәсіпорынның ерекшелігі – ауыл шаруашылығы өнімдері мен сәндік өсімдіктерді үйлестіруінде: жылыжай өңір тұрғындарын әрі жаңа піскен көкөністермен, әрі әсем гүлдермен қамтамасыз етіп, көркейтуге және өмір сапасын жақсартуға үлес қосады.
Қазіргі уақытта жылыжайда төрт қызметкер еңбек етуде, алайда күзге қарай ұжым санын он адамға дейін ұлғайту жоспарлануда. Бұл өндіріс көлемін арттырып, жаңа жобаларды іске асыруды жеделдетуге мүмкіндік береді.
Даму жолында кәсіпорын белгілі бір қиындықтарға да тап болды: өсімдіктер аурулары салдарынан топырақты тұрақты ауыстыру қажеттілігі, ескі құбырларды қайта жаңарту және көкөніс қоймасын заманауи тоңазытқыш кешеніне қайта жабдықтау. Мұның бәрі елеулі инвестициялар мен техникалық шешімдерді талап етеді, алайда компания басшылығы қиындықтарды еңсеру әрі қарайғы өсімге серпін береді деп сенеді. Еңбекқорлық пен дамуға ұмтылудың арқасында жылыжай нарықтағы позициясын нығайтып, өнім ассортиментін кеңейтіп, әр клиентке сапа мен қамқорлықты сақтап келеді.
Жылыжай тарихындағы маңызды кезеңдердің бірі – қалалық тендерлерге қатысу болды. 2012–2015 жылдары кәсіпорын Жезқазған мен Сәтбаев қалаларын абаттандырумен белсенді айналысты, көшелерді, алаңдарды және қоғамдық аумақтарды көгалдандырды. Соның арқасында қалалар түрленіп, жарқын түстерге бөленіп, шын мәнінде күтімді әрі тартымды келбетке ие болды. Бұл жұмыс қалаларды әсемдеумен қатар, жылыжайдың ауқымды жобаларды орындай алатынын және өңір дамуына үлес қоса алатынын дәлелдеді.
«Даму» қорының «1 Кепілдік қоры» бағдарламасының қолдауы мен «Банк ЦентрКредит» АҚ қаржыландыруының арқасында компания көкөніс пен гүл өсіруге арналған жылыжайды сатып алды. Қор қарыз сомасының 50 %-ы көлемінде кепілдік берді. Бұл қаражат өндірісті нығайтып, кеңейтуге, заманауи жылыжай кешенін сатып алуға және жөндеу жұмыстарын жүргізуге мүмкіндік берді. Кәсіпкерлер шаруашылықты одан әрі дамыту, жылыжайды жаңғырту және жұбайымен бірге жаңа бағыттарды іске қосу жоспарларын құрып отыр.
«Әр адам дамудан тоқтамаса, кәсіпкер бола алады», – дейді Зура Қонурбаева. Бұл сөздер оның жолын айқын көрсетеді: алға ұмтылу, жаңа сын-қатерлерге дайын болу және еңбек пен табандылықтың жеміс беретініне сенім.
Мекен-жайы: Ұлытау облысы, Жезқазған қаласы, Промзона көшесі, 5
Тел: +7 775 199 55 85
Instagram: @ulytauflora
